|
|
|
INTERNATIONAL ARAMEAN ONLINE FORUM |
|
|
| Post Number: 1
|
Jan Bet-Sawoce 
Group: Members
Posts: 35
Joined: Oct. 2007
Member Rating: None
|
 |
Posted on: 20 Oct. 2009, 22:47 |
|
   |
Suroyo TV, Muxabarat d Suriya, Cito, Ḫasye, Qaše, ...
Jan Beṯ-Şawoce
Aṯmël blalyo, Suroyo TV, këtwole qëbolo cam Ayman Calluš. Ayman Calluš kowe u qonşoloş d Suriya bu Swed. Cal i warëqto, bi rasmiye qonşoloşyo, bas bi ẖaqiqa, cwodo d qonşoloş, aw xëd qonşoloş nëquşo këtle. U hadaf diḏe, harke bu Swed, bayn daş şëroye d maqwe i dawle d Suriya´yo.
Ayman Calluš, zlam cwëdle zabno yarixo b gawe dam muxabarat caskariye b Suriya. Ḫa fanatik carab Bacṯi´yo. Idoṯe mganbëlene b admo d ğalabe noše.
Adyawma Suroyo TV, Suryoyo Sat, a tre, hawën qeno li dawle d Suriya. Ḫad du babaṯṯe d mëžğoli xabro cwijo cal Suriya! Haqqa maşrene bi dawle w bam muxabarat d Suriya!
An noše kobi kalla, bu kallano kmisëm cwodo lašan i dawle fašiye d Suriya.
Ucdo, adyawma, a tre ẖasye, b kise d Suriya´ne. At tarte citawoṯo Mor Yacqub w Mor Afrëm, ẖad du babaṯṯe d mëžğoli, ẖa xabro ẖarbo cal Suriya! D oṯe d mëžğoli, Suriya gëd mutwi a tre ẖasye, gëd mašmëţi aj jule da tre. Haqqa taṯir rabo hawila li dawle.
A tre talawizyonat, ksaymi cam ẖḏoḏe ẖëngaliyo bu tëzido du lišono carabi. I cito, u kuhno dlë mşale bu carabi, dlë korëz bu carabi, ftiẖo kummile: B carabi kraz w mşalay!
Ḫasyo Ablaẖad Gallo Šabo...
Ëšqaḏ, bu yarẖano. Aṯi ẖa l gabi li madrašto. Qay aṯi? Mcajabno ğalabe. Lë maẖweli b ruẖi. U zlam ste, mu cwodayḏe cam am muxabarat d Suriya, kuḏacnole ğalabe kayiso.
Drele šlomo, omër: Kibi d cubarno?! Macbarli, hawilan mahwo w šqolo ğalabe yarixo. Bu ziyudo kšumacnole. Mërleli omër: Kayiso kuḏcatli, bas matrakli. Aṯino kubac d umarnolox qay matrakli. Ğalabe naqlat kṯëwlox, kkëṯwët aclayna, cal ac cumala, cal Suriya. Kulle bi dëkṯo. Heš mi majalle dë Nsibin cajizewan menox. D nëflatwo b iḏayna, gëd ëzzoxwo gab ẖëltox. Bas lë nafilët b iḏayna, la´an kowët moro l ruẖox.
Ḫur d umarnolox, u mede dë kṯëwlox, kule mtarjëmoyo lu carabi. Këmraqbina kul mede w kul nošo. I dawle b kul dukṯo këtla noše, ucdo zëd më meqëm.
Ḫur d umarnolox, a tre tilvizyonat Suroyo w Suryoyo, at tarte citawoṯo, a tre ẖasye, al lëjnat, i Mtakasto,.. kulle taẖt mu ëšraf diḏan kmalxi. Aẖna këmdabrina kulle.
Bam momo kmëftakrët, u zlamano l mën aṯi l sidi? Kuḏac zëcṯo më mede latlox. Këtlox ṯaqafe siyasiye, këtlox klayto naḏëfto. Aẖna këmminala šarife. U wëjud diḏan lë kmazëclox. La´an ğer ţërbaye këtlox. D huwatwo më Suriya, suri, i naqlayo šuğlox başitwe bas latat. Hatu këtxu ṯaqafe w ţërbaye tërkiye. Lë kzaycitu.
Ḫur d umarnolox, ëno ucdo ţreli mu cwodo d këtwoli cam am muxabarat. Aẖna këmminalle “cumala”. Qayo? Gëd umarnoloxyo...
Meqëm bë kmo yarẖe, b cayni dlë ẖuzeno, abadan, qaţcan w aşlan lë mëtyaqannowo... Haṯe gëd maẖkenoxyo bëṯër. Bu cwodo d cam i dawle d Suriya, qarci cabër b ğalabe balawat. Dcoro haw fayišli. Yawmo may yawme, kuḏac ğalabe kayiso, gëd mëtleno. Amma hul d oṯe meni ste, këmjahadno lašan mede d loṯe cal qarci, al-muhëm!
Hano mëţran Ablaẖad Gallo Šabo, këtle wakilo lu mal diḏe bë Briţanya. U wakilayḏe, zlam camil suriyo. Mëţran Ablaẖad Gallo Šabo, tamo bu bank ingilizi, mën këtle, mën latle, kmawḏacle ṯawran li dawle d Suriya. Am maclumatani d kumarnox, maclumat mawṯuqane, xilaf, dugle abadan layto ebayye.
Mëţran Ablaẖad Gallo Šabo, bu bank ingilizi, adyawma këtle kalla, cël më 20 malyune. Hani maykone? Aydarbo maltëmile? B şaraẖa mšawašno, ucdo ste mšawšono.
Mëţran, rajul din d këmmina, aydarbo kuwele haqqa kalla?
|
 |
|
|
| Post Number: 2
|
Jan Bet-Sawoce
Group: Members
Posts: 35
Joined: Oct. 2007
Member Rating: None
|
|
Posted on: 21 Feb. 2010, 15:04 |
|
 |
Suroyo TV, Muxabarat d Suriya, Cito, Ḫasye, Qaše, (2)
Këtlan maṯle ğalabe bu lišono şurayt. Hani cal dlo kṯiwi, bde kmëţcoyi. Mawxa kẖuzeno ğalabe muhim hani d mëkṯowi. Ḫa mam maṯlani komër hawxa: Aṯto d huwela lišono maluţo, kmarfiyo qriṯo bë ẖḏoḏe.
8-9-10, bu yarẖano d konun-ẖaroyo, Suroyo TV glele ruẖe haškara cam manyo w droco d manyo? Han naqqa u zlam mdabrono di “Orucuṯo” d komër Jan Beṯ-Şawoce mdaglonoyo, ţër nofëq omër am muxabarat d Suriya mëqqa kalla kobi l Suroyo TV?
Aẖe w Aẖwoṯo!
Taẖt kul kṯawto, dlo nëkfuṯo, kito ëšmi. Këtli fëkër, këtli dacwa, këtli masale,... këzzi bëṯra. I masalaṯe, masale du camo w u mëstaqbël diḏeyo! Mede d minakafno, d tuleno ruẖi, ëšmi lë këbene, gëd mşacarno, gëd raqno,... hani mëdone ğalabe ğalabe caybone bi siyase. Haka lë koṯe meni d cëwadno, klozëm d yëtawno bu baytayḏi w šuleno! I cade hawxayo!
Maẖëtli cal ruẖi, i dacwa du camayḏan, dacwa mqadaštoyo, haṯe klozëm mëcwadla! I haymonuṯo d këtli haṯeyo, u mede d koṯe meni dlo qëşoro cam ẖawrone kcuwadnola!
Šan d hawxa, u ẖa d koṯëw pozitiv aw negativ mqabël du mede d kumarno, ţër koṯëw ëšme. Bu mede d kumarno ste, nošo kmaẖës, koḏëc dugleyo, kibe d ubeli li maẖkame. Tamo kiban ẖëšwina ẖḏoḏe, manyo u ẖaq w manyo d latyo u ẖaq.
U muxbërji suri, tëltaḏ d aṯi l sidi, u mede d maẖkëleli gëd mdawamno ebe...
“Meqëm bë kmo šne, sim ëntixabat di rayase di jëmhuriye b Suriya. Mrašẖo ğer mu qawwad d Baššar nošo latwo. Maẖëtte sanduqe lam muğţarëbin ste. Yacni lan noše d këtne larwal me Suriya. Kito safarat (qonsolosat), tamo lë kmaẖtënne, kmaẖti sanduqe bac citawoṯo.
Kul cito d maẖëtla sanduqo, tamo ẖasyoyo qayëṯle 50 alfo euro. Qašoyo qayëṯle 25 alfo euro. Kul ẖa suri jbari, azze lu sanduqo. U ẖa d lazze, bi safara msajël ëšme. Hani ţlib ẖšowo mënayye.
I akṯariye dac cumala harke bu Swed, sëryoyene. Yawmiyyan kkëṯwi taqarir. Hani b gawe d fërucene. Ḫa maf fërucat muhëm, hano dam muxaḏḏaratyo. Ucdo harke b Södertälje, b Boţšërka bas d kowe ẖaflat daš šabab, u fërcano tamo këmzabën laš šabab. Ğalabe clayme hawxa madranne lašan d rëẖqi mu mëštamëc w mi siyase.
Kito fërëc ẖreno, kmacwëd niše. B gawe dam mu´assasat man kito lë šqolo, cal iḏe dan nišani kmëšqël, kmisëm zlam šan d noqël mën kowe b gawe di mu´assasayḏe. Hawxa kowe maḏco gab i safara w gab i dawle Suriye, mën kowe w mën lë kowe.
Samira Ğarib-Ḫardo ẖḏo camile catëqtoyo, marwaxla ğalabe noše cal i zoţëke d ruẖa. Mawqaḏla babe d ğalabe noše. Bi ẖarayto mawqaḏla babe du abro d ruẖa ste. Aydarbo? Gëd maẖkenolox.
U Mahër li emo masëmla camil. Cwëdle bu zëbono dam muxaḏḏarat. Mu kalla d uṯewo l iḏe, lë ubewole lam more du mal. Aṯi zaman, am more ẖşërre, mhadadde,... lë manfacle.
Bdele dë mqatël cam i emo, mhadadle gëd maške aclayye lu polis du Swed. Mërle li emo, ksoyëm qayëme (lista) man kito cumala li safara w li dawle d Suriya. I emo mxabarla acle lu safir Dr. Bassam Al-Cimadi bëḏḏat.
Bdalle bu lišono basimo, këzzën bëṯre. I emo acmayye, kuḏco gëd quţlile. B iḏa mawbela lu fëndëq (otel). Mahër ẖšëwle fëndëqyo, mede ebe lë kmisëm. Bu fëndëq, bu ţaboqo da tmënyo, awwël d cabër l lawğël maşërre. Sëmme taẖqiq acme. Mcaḏabbe. Bëṯër mẖalaqqe mu ţaboqo da tmënyo l laltaẖ. Hawxa i emo w am muxabarat suriye xalişi mene.
Kito mede ẖreno ğalabe muhim, kubac d maẖkene. Hano Eliyo Bahe, kuḏcatle? Ucdo mšayacce ẖasyo l Kanada. Hano Eliyo Bahe u ẖawro d Ḫasan Naşralla´yo. Kuḏcët Ḫasan Naşralla manyo? Ḫasan Naşralla u zacim du ẖëzëb d Ḫëzbullah´yo. Hano Eliyo Bahe, meqëm d ëzze l Kanada b ğalabe, azze l Lëbnan mëdla dawra gab u Ḫëzbullah cal u kontra-spiyonaj. U ẖasyo d Awuşṯralya u Malke nafs du mede mëdle.
Hani këtte ẖa hadaf: D maşri i cito w u camo bi dawle d Suriya. Bu mëstaqbël gëd bodën xulqi bëlbole b gawe di cito. Gëd mamẖën w gëd maqţëli noše.”
|
|
|
|
| Post Number: 3
|
Jan Bet-Sawoce
Group: Members
Posts: 35
Joined: Oct. 2007
Member Rating: None
|
|
Posted on: 06 Apr. 2010, 23:07 |
|
|
Suroyo TV, Muxabarat d Suriya, Cito, Ḫasye, Qaše, ... (3)
Bu Swed, awwël naqla bu tarix, mid qarar: Hawi Sayfo! Ğalabe noše baynoṯayna fşiẖi w ğalabe noše ste ğbini.
Këmmina: Tawdi li dawle du Swed! Ban 1960´yat, ban 1970´yat, ban 1980´yat w hul l adyawma ste kuṯena l gaba, kẖëwyolan. Maxlaşlalan mi gracyuṯo d cayšinawo taẖt iḏe dat tërk, dac carab, daf fërsoye, dak kurmanj w di cito.
Kito bu şurayt maṯlo komër hawxa: I ẖaqiqa mayërtoyo!
Mqabël d haṯe, bu Swed aẖna mën sëmlan? Kubac haṯe d ţurena l ğer kṯawto. La´an hani kulle klozëm d mëkṯowi, w dlo!? Aẖna, aydarbo gëd uḏcina ruẖayna, mën šëkël malna? Bu Swed Mtakasto, Ḫuyoḏo Oṯuroyo, Ḫuyoḏo Suryoyo, cito w ğer... hani aydarbo hawën? Qay hawën? U maqşad, i ğaye, i dacwa mënwa? Aṯi u zawno, hani klozëm d mëgloyi! Mën cayëšno, mën šamëcno, mën ẖzeli,... hani kulle, aṯi u zawno d mëkṯowi.
Aẖnone w Aẖwoṯo,
I ẖaqiqa, mëqqa d huwyo mayërto ţro d huwyo, klozëm d ëmminala. Lë kowe d tulenala. D tulenala, mëqqa gëd fayšo tliṯo? Šato, tarte, zëd, noqëş,... ëlla yawmo may yawme gëd miţamiro aw gëd nëfqo li ẖolo.
Xëd camo, aṯi ğalabe ẖarbuṯo l rišayna. I ẖarbuṯaṯe, tre šëklatwa, ẖḏo më larwal ëṯyowa, haṯe këmminala barayto w i ẖḏo ẖreto ste, aṯayto më lawğël, haṯe ste këmminala gawayto. Aẖna, bu tarix, dayëm ẖzelan w sëmlan ẖšowo li ẖarbuṯo d këtwa barayto. Bas i gawayto, abadan lë ẖëzyolan ... Haṯe mëqqa tahlukawa? W lo yawmo, lë yatëwina w sëmlan ẖšowo ela... Hul ucdo ste, cal cayni račeta, harke bi goluṯo, hawxa këmdawmina. Ma hawxa ẖaleyo?
Bu šëwolo du Sayfo, i tahluka barayto, šanan i dawle qaţëlto d Kamal´wa, ucdo ste w ramẖël ste hiyyayo. Cwëdlan, u kcëwdina mqabël diḏa. U cwodano ste, dayëm galyo sëmlan. Bu mëstaqbël ste, hawxa galyo gëd mdawminale. Latlan mede d minakfina ebe!
Aẖna, an noše d këtna bu ẖaqlano, i naqqa d hiw qarar: Hawi Sayfo! Kulan fşëẖina. La´an hani ëšnayo, kcëwdina lašan d maṯbëtina li arco w li šmayo baf frose, bak kṯowe bad dokumane w baş şërtoṯo... Hawi Sayfo! Heš ste, u cwodo d kito, lašanayna lë tayëm, gëd mdawëm.
An noše ğbine, hani abadan d labici d howe qarar lašan u Sayfo, ẖa mënayye Ḫazayel Şawme d mërle: Lawi Sayfo, d huwewo Sayfo, nošo baẖ haye lë kfiyašwo! Gabe bu bayto këtwole dosyat rize, kulle, malye dokumane cal u Sayfo. Hani aykone? Mayko amţalle? Nošo maḏco latle!?
Kito maṯlo komër: U šamco du mdaglono, hul colam, qayiṯo lë kfoyëš!
Bëṯër mu qarar du parlamento, Suroyo TV czëmle aẖ ẖawronayḏe; Ablaẖad Gallo Šabo w Ḫazayel Şawme lu talawizyon. Cam ẖḏoḏe, sëmme u Sayfo mu rišo w hul li ẖarayto mal l ruẖayye. Nafëqile moro.
Kito maṯlo komër: B tarte fëṯoṯo... Hani fayiti u maṯlano, maṯlo ẖreno l boli lë koṯe d këṯawno harke. B dukṯa kţureno u xabro l ğer ẖa d koḏëc mëdone dlë kmiḏoci.
U muxbërji suri, tëltaḏ d aṯi l sidi, u mede d maẖkëleli gëd mdawamno ebe...
“Tërkiya w Suriya, bi qaḏiye kërdiye aṯën lë ẖḏoḏe. Tërkiya këmqadmo ţalabe ğer mi qaḏiye kërdiye l Suriya. I qaḏiye sëryaniye. Tërkiya kţëlbo më Suriya, cal iḏe du faţëryarxo d mitakle u cwodo d kito cal u Sayfo b gawe dac citawoṯo b Awruppa.
Bi masale du Sayfo, mëţran Cisa hawiwo kubo bë qḏole d Tërkiya. Mëţran di cito kmakrëx Sabri Aţman bac citawoṯo, ksoyëm dëcaye, këmwacëḏ, kmaqëm i šëcraye (manṯo) dan noše bi qaḏiye dam majazër cibadiye du Sayfo,.. muxţaşar d umarnox, hani latwayye mëdone d Tërkiya d sukto aclayye.
Mëţran Cisa, Kaman këtwole mede ẖreno, lë rëẖamwo am maţarin d koṯën mab bilad dac carab. Calani umarwolle “Hatu carab hatu, latatu sëryan!”
Suriya këtla şayţara cal i cito. Haṯe abadan lë këbco d ëzza me iḏa. Këtla maşlaẖa siyasiyye, iqţisadiye, diblomasiye w ẖatta wasile lu tariq du inşiẖar di šabibe b Awruppa. Cal u darbo di cito w du din d marẖëqolën mi siyase.
I dawle Suriye, lašan i qaḏiye mëţţaşela cam mëţran Jorj Şaliba fi Jabal Lëbnan. Lo ţocët harke mede ẖreno, mëţran Jorj Şaliba ẖa maş şadiqin qariwe d Ḫasan Naşralla u zacim du Ḫëzaballah´yo. Dayëm knofëq bu tëlfizyon du Manar. Tamo, kmëtkalëm b ëšme das sëryan w di cito.
I dawle Suriye sëmla xëţţa, aydarbo gëd manfëqo mëţran Cisa mu tariq diḏa. Mi xëţţaṯe an noše d këtte xabro mëţran Jorj Şaliba ẖa´yo. Mëţran Ḫazayel da treyo.
Mëţran Jorj Şaliba cam u tanḏim dad Dawronoye këmẖaḏri kamin l mëţran Cisa. Këmqadmile dacwa l muẖaḏara lë Swisra. U tariq du mazlo le Swisra, ğer mu tanḏim dad Dawronye nošo lë kuḏacle. B Almanya bu utel, mëţran Cisa kmoyëṯ. Am muxabarat Suriye këtte fan w xëbra bu tloyo dan noše. I camaliye hawxa kmëţyo li nihaye.
Bëṯër mi camaliye, bi masale du Sayfo kzohër lu maydan mëţran Ḫazayel Şawme. Kmëczëm li safara Tërkiye kmo naqqat l mëklo w štoyo. Kqaṯle mablağ d baxšiš lašan d makle i qaḏiye du Sayfo.
Bi camaliye, mëţran Ḫazayel Şawme lë kmiwafëq. Bde bu antarnat hjomo qawyo acle, kmibahdël. Knofël u šarwolayḏe bayn d rağloṯe.
Mëţran Jorj Şaliba, ksoyëm ëţţişal cam Suroyo TV, kobëc manne difac can mëţran Ḫazayel Şawme. Hawxa bu šëklano qadiri d fëlği i jale sëryaniye lë tre jabhat.”
Edited by Jan Bet-Sawoce on 06 Apr. 2010, 23:07
|
|
|
|
|
|
|
|
|
|
